Lëvizja Vetëvendosje ka vazhduar fushatën elektorale për zgjedhjet e 12 tetorit në qytetin e Podujevës, me një tubim të organizuar me gratë dhe vajzat e këtij qyteti.
Shpejtim Bulliqi, kryetar aktual, i cili synon edhe një mandat në krye të kësaj komune premtoi se Podujeva do të ketë perspektiva të reja përmes projekteve dhe investimeve të planifikuara, veçanërisht në shëndetësi dhe arsim.
Para se të shpaloste programin e tij dhe të kërkonte edhe një mandat tjetër në krye të komunës, Bulliqi foli për arritjet e qeverisjes së tij katërvjeçare në Podujevë.
“Nuk kemi asnjë fushë institucionale apo shërbim që nuk ka pësuar ndryshime gjatë këtyre katër viteve. Ne nuk themi se nuk është punuar për 20 vite, por këto pesë vite kanë qenë intensive. Këto punë e kanë ndryshuar Podujevën. Jemi fokusuar në pamjen e qytetit, fillimisht me sheshin, kjo ka qenë puna e parë”, tha ai.
Gjatë fjalimit të tij, ai kërkoi besimin e qytetarëve për edhe një mandat tjetër, duke premtuar përfundimin e projekteve të nisura.
“Kemi filluar një projekt për kuzhinën qendrore, që të ofrojmë ushqim për nxënësit, pasi planifikohet që në mandatin e ardhshëm të fillojë mësimi i plotëditor. Gjatë kësaj periudhe, fëmijët do të kenë mundësi të ushqehen në shkolla, në mënyrë që nënat të mos kenë obligim për ushqimin. Po ashtu, kemi projektin për të moshuarit”, shtoi ai.
Në këtë tubim u theksua gjithashtu se avancimi dhe mbështetja e grave do të jetë prioritet i qeverisjes së Lëvizjes Vetëvendosje në Podujevë.
