Ministria e Punëve të Brendshme e Republikës së Kosovës ka njoftuar qytetarët se nga data 12 tetor 2025 do të nisë zbatimi i Sistemit të Hyrje/Daljes (Entry/Exit System – EES) në disa pika kufitare kryesore të Bashkimit Evropian.
Ky sistem i ri, i cili do të zbatohet gradualisht gjatë gjashtë muajve të ardhshëm në të gjitha pikat kufitare të BE-së, ka për qëllim të modernizojë dhe shpejtojë proceset e kontrollit kufitar për shtetasit e vendeve jo-anëtare të unionit.
“Entry/Exit System – EES, është një sistem biometrik i cili regjistron hyrjet dhe daljet e shtetasve të vendeve jo-anëtare të BE-së, duke mbledhur të dhëna: si shenjat e gishtërinjve dhe fotografi. Ky sistem synon përshpejtimin e kontrolleve kufitare dhe eliminimin e vulave në pasaportë”, thuhet në njoftim.
Ministria e Punëve të Brendshme ka theksuar se do të vazhdojë të monitorojë nga afër këtë proces dhe të informojë qytetarët e Kosovës për çdo zhvillim të mëtejshëm që lidhet me zbatimin e sistemit të ri.
