Aleanca për Ardhmërinë e Kosovës ka zhvilluar tubimin e radhës zgjedhor në komunën e Gjilanit. Në këtë aktivitet, kryetari i AAK-së, Ramush Haradinaj, së bashku me kandidatin për kryetar të kësaj komune, Nazim Gagica, kanë prezantuar vizionin dhe programin qeverisës për te ardhmen e Gjilanit.
Haradinaj, theksoi rëndësinë e mbështetjes nga qytetarët në këtë proces zgjedhor, duke garantuar se AAK është e përkushtuar për një zhvillim të qëndrueshëm, krijimin e mundësive të reja ekonomike dhe përmirësimin e jetës së përditshme të qytetarëve.
“Nuk mund të kesh ujë të pijshëm nëse nuk ke siguruar rezerva, burime edhe për breza të tjerë, gjithmonë do të ketë probleme. Nuk është vetëm rrjeti. Mungesa e ujit të mjaftueshëm krijon probleme zingjirore, shkakton pasoja të zhvillimit ekonomik, të higjienës, shkakton epidemi, janë gjitha problemet që vijnë me radhë. Ne i kemi parasysh obligimet që na dalin”, tha Haradinaj.
Haradinaj, bëri thirrje që të votohet kandidati i këtij subjekti për kryetar të Komunës së Gjilanit, Nazim Gagica, duke theksuar se kjo është në të mirë e qytetarëve.
Kandidati për kryetar, Nazim Gagica, paraqiti prioritetet e tij programore, të cilat përfshijnë investime në infrastrukturë, arsim, transportit urban e shëndetësi.
“Gjilani së shpejti do të hyjë në fazën e rrezikut sa i përket furnizimit me ujë të pijshëm dhe ne kemi një program konkret për nivelin nacional. Transportin publik urban kemi prezantuar dhe kemi ofruar para qytetarëve një projekt të analizuar, i matshëm, i arritshëm dhe i realizueshëm”, tha Gagica.
Gagica premtoi se në bujqësi do të krijojnë siguri përmes një fondi komunal që do të sigurojnë 70 për qind kompensim për dëmet natyrore.
Duke bërë thirrje për të votuar numrin 174, Aleanca për Ardhmërinë e Kosovës u zotua për një ndryshim të thellë në Gjilan dhe përmirësim të jetës së qytetarëve, në rast se kjo komunë do te udhëhiqet nga ky subjekt politik.
