Është mbajtur Seanca e Përgjithshme e Gjyqtarëve të Gjykatës Supreme, e drejtuar nga kryetari, Fejzullah Rexhepi, me pjesëmarrje të gjyqtarëve, përfshirë ata nga Dhoma e Posaçme e Gjykatës.
Përmes një komunikate për medie Gjykata Supreme njofton se gjatë kësaj seance janë diskutuar dhe miratuar katër mendime juridike, një udhëzues dhe një qëndrim parimor.
“Mendimi Juridik për përfundimin e procedurës kontestimore me aktgjykim në bazë të pohimit, heqjes dorë nga kërkesëpadia, pajtim gjyqësor dhe marrëveshje të arritur në procedurën e ndërmjetësimit; -Mendimi Juridik lidhur me parashkrimin fitues; Mendimi Juridik për të mitur; Mendimi Juridik lidhur me çështjen e aktakuzave; Udhëzuesi për Pastrim të Parave dhe Qëndrimi Parimor lidhur me kompetencën lëndore, për të gjykuar/vendosur për propozimin për përsëritje të procedurës”, thuhet në komunikatë.
Tutje bëhet e ditur se gjyqtarët e Gjykatës Supreme arsyetuan nevojën për nxjerrjen e këtyre dokumenteve, pas analizimit të praktikës gjyqësore në instancat më të ulëta gjyqësore dhe në fazat e hetimit të çështjeve.
Më tej thuhet se, bazuar në agjendën e seancës, është miratuar edhe ndryshimi i ‘Planit dhe Programit të Punës së Gjykatës Supreme’, në të cilin u përfshinë tre gjyqtarët e rinj, Qerim Ademaj, Faton Bajrami dhe Faton Ademi, të avancuar në Gjykatën Supreme.
