Kandidatja për kryetare të Vushtrrisë nga Nisma Socialdemokrate, Xhevahire Izmaku ka mbajtur tubim me gratë në këtë komunë.
Izmaku tha se, Vushtrria duket se po dëshiron të fillojë historinë politike nën udhëheqje të një gruaje.
“Jemi mbledhur jo vetëm për të folur për politikë, por edhe për jetën tonë të përditshme, për sfidat dhe ëndrrat që i kemi për Vushtrrinë. Unë besoj fort që gratë janë shtylla e shoqërisë e forca e zhvillimit. Vajzat janë e ardhmja dhe shpresa jonë për nesër, pa zërin dhe guximin tuaj nuk ka ndryshim të vërtetë”, tha Izmaku para të pranishmeve.
Kandidatja e Nismës për Vushtrrinë tha se është koha që puna dhe iniciativa e grave të vlerësohet vërtetë.
Ka premtuar bursa për vajzat studente, ndërtim të një qendre sociale, e ndërtim të një shtëpie të sigurt për viktimat e dhunës në familje.
“E di që shumë vajza kanë ëndrra për shkollim e karrierë. Me mua si kryetare secila vajzë që studion do ta ketë bursën e saj. Për nënat kryefamiljare do të ndërtojë qendër sociale për banim në mënyrë që asnjë nënë me fëmijë të mos mbetet pa strehë të sigurt. Do të marr iniciativë për ndërtimin e një shtëpie të sigurt për strehimin grave e fëmijëve si viktima të dhunës. Do të ndërtojë çerdhe në pjesët ku nuk ka”, ishin disa nga premtimet e Izmakut.
Ajo u ka uruar suksese të gjitha grave që janë kandidate për kryetare të komunave nga të gjitha partitë politike.
