Avokati i Popullit organizon takim me partnerët ndërkombëtarë për 25-vjetorin e themelimit të institucionit Avokati i Popullit, Naim Qelaj, ka organizuar të martën një takim me partnerët ndërkombëtarë për nder të përvjetorit të 25-të të themelimit të këtij institucioni.
Gjatë takimit, Qelaj theksoi se mungesa e konstituimit të Kuvendit të Kosovës përbën një sfidë të madhe për funksionimin e institucioneve të vendit.
“Së fundmi, sfidën më të madhe e kemi mungesën e vullnetit politik për konstituimin e Kuvendit dhe formimin e qeverisë dhe institucioneve të tjera pas zgjedhjeve. Gjatë viteve të mia si Avokat i Popullit, kam vërejtur një tendencë që, në situata të tilla, institucionet e pavarura goditen dhe janë nën kërcënim në forma të ndryshme – qoftë përmes deklaratave publike, qoftë përmes anashkalimit dhe injorimit të qëndrimeve që i merr Avokati i Popullit,” theksoi Qelaj.
Ai vuri në pah edhe sfidat e tjera, si mungesa e vullnetit politik për funksionalizimin e institucioneve.
“Nuk ka qenë e lehtë që sot të jemi një institucion i konsoliduar, bazuar në standardet më të avancuara të Bashkimit Evropian, dhe me një rol kyç në shtetndërtimin e Kosovës, sa i përket respektimit të të drejtave themelore të njeriut. Institucioni i Avokatit të Popullit ka pritur në zyrën e tij mbi 52 mijë qytetarë, që është një tregues i jashtëzakonshëm i hapjes dhe afërsisë ndaj shqetësimeve dhe problemeve të qytetarëve të të gjitha etnive dhe komuniteteve. Janë mbi 2,300 rekomandime që i janë dhënë autoriteteve publike, lidhur me avancimin dhe respektimin e të drejtave themelore të njeriut. Për më tepër, mbi 90 agjenci ndërkombëtare e kanë mbështetur këtë institucion. Sfidën më të madhe e kemi mungesën e vullnetit politik për konstituimin e Kuvendit dhe zgjedhjen e qeverisë dhe institucioneve të tjera”, tha Qelaj.
Avokati i Popullit u shpreh para diplomatëve të huaj për nevojën që partneriteti me aleatët ndërkombëtarë të fuqizohet dhe të vazhdojë edhe më tej në drejtim të respektimit të të drejtave të njeriut.
Pjesë e kësaj tryeze ishte edhe shefi i Zyrës së Bashkimit Evropian në Kosovë, Aivo Orav, i cili vlerësoi arritjet e Avokatit të Popullit në avancimin e respektimit të të drejtave të njeriut dhe barazinë në Kosovë.
