Të paktën 60 persona kanë humbur jetën dhe më shumë se 140 të tjerë janë plagosur në një tërmet të fuqishëm me magnitudë 6.9 ballë në Filipinet qendrore, me zyrtarët që kanë frikë se numri i të vdekurve mund të rritet ndërsa ekipet e shpëtimit po kërkojnë nëpër ndërtesat e shembura këtë mëngjes.
Tërmeti goditi brigjet e qytetit Bogo në provincën Cebu në rajonin qendror Visayas pak para orës 22:00 sipas kohës lokale të martën, duke shkaktuar ndërprerje të energjisë elektrike dhe shembjen e ndërtesave, përfshirë një kishë më shumë se 100 vjeçare.
Provinca Cebu, një nga destinacionet turistike më të njohura në Filipine, është shtëpia e 3.4 milionë banorëve. Aeroporti Ndërkombëtar Mactan-Cebu, porta e dytë më e ngarkuar e vendit, vazhdoi të funksiononte.
“Ne me të vërtetë kemi nevojë për ndihmë”
Tërmeti goditi më rëndë komunën e San Remigio-s. Në zonë është shpallur gjendje katastrofe për të përshpejtuar shpërndarjen e ndihmave. Alfie Reynes, zëvendëskryetar i San Remigi-t, bëri thirrje për shpërndarjen e ushqimit dhe ujit për të evakuuarit, si dhe pajisje të rënda për të ndihmuar ekipet e shpëtimit.
“Po bie shi me rrëmbim dhe nuk ka energji elektrike, kështu që kemi nevojë për ndihmë, veçanërisht në pjesën veriore sepse ka mungesë uji pasi tubat e furnizimit u dëmtuan nga tërmeti”, tha Reynes për radion DZMM.
Pacientët e evakuuar
Në qytetin fqinj të Bogut, pranë epiqendrës së tërmetit, pacientët e spitalit u evakuuan dhe lëkundjet e forta pasuese detyruan shumë banorë të qëndronin në qendrat e evakuimit dhe në rrugë.
Agjencitë e monitorimit të tërmeteve vlerësuan thellësinë e tërmetit në afërsisht 10 kilometra dhe regjistruan disa lëkundje pasuese, më e forta prej të cilave ishte me magnitudë 6. Nuk kishte kërcënim për një cunami pas tërmetit.
