Fshati Biçec ka qenë ndalesa e radhës e kryetarit të Lëvizjes Vetëvendosje, Albin Kurti në kuadër të fushatës elektorale për zgjedhjet e 12 tetorit.
Duke i dhënë mbështetje dhe kërkuar votën e banorëve te këtij fshati, për kandidatin e Vetëvendosjes për kryetar të Kaçanikut, Jeton Raka, Kurti tha se ndryshimi i ka ndodhë e që ky ndryshim do të vazhdojë edhe nëpër komunat e Kosovës me udhëheqjen e Lëvizjes.
“Ky ndryshim që të jetë edhe më i prekshëm edhe më, në Komunën e Kaçanikut kemi nevojë që të arriturat e mëdha të Kosovës t’i përcjellim edhe këtu dhe për këtë na duhet ndryshimi e ku ky ndryshim e ka emrin e kryetarit të ardhshëm Jeton Raka”, tha Kurti.
Nga ana tjetër, kandidati i Vetëvendosjes për kryetar të Kaçanikut, Jeton Raka, u shpreh i vendosur për të sjellë zhvillim dhe kushte më të mira për qytetarët e kësaj komune.
“Fshati Biçec e të gjitha fshatrat do të zhvillohen barabartë e proporcionalisht. Kaçaniku ka problem me furnizim me ujë të pijshëm, ka nevojë çerdhe një lagje që është lënë në harresë. Komunën e Kaçanikut e kemi vetëm një çerdhe dhe jemi zotu që kemi me pasur edhe tri çerdhe të tjera për fshatrat e mëdhenj në të njëjtën kohë do t’u jepet mundësia që edhe grave të jenë të lira. Komuna e Kaçanikut ka me u shndërrua në kantier të investimeve kapitale, 13 milion euro janë të buxhetuara”, tha Raka.
