Ndonëse sezoni i dimrit për ngrohje ende nuk ka nisur, në fshatrat e thella malore kanë filluar reshjet e borës, ndërsa është parë e nevojshme të nisë ngrohja e objekteve shkollore.
Ka ditë që në fshatin Mushnikovë kanë filluar ndezjen e ngrohjes qendrore, pasi temperaturat në këtë vend, 900 metra mbi nivelin e detit, ishin të ulëta.
Këtë fillim tetori, shumë fshatra të komunës së Prizrenit u zbardhën nga reshjet e borës.
Temperaturat kanë shënuar rënie të dukshme, ndërkohë që oxhaqet e shtëpive kanë filluar të nxjerrin tym. Edhe në shkollën e fshatit Mushnikovë, të Luginës së Lumbardhit, është parë e nevojshme të ndizen stufat për krijimin e kushteve optimale për mësim.
“Prej ditës së hënë e deri më sot ne jemi duke e përdorë ngrohjen qendrore në shkollë, për sivjet ende nuk jemi të furnizuar me lëndë djegëse, për shkak se procedura është në tender, por për ne nuk paraqet ajo fare problem, sepse ne ç’do vit marrim pak ma tepër që na duhet, kështu që ne kemi ‘pelet’ të mjaftueshëm për fillimin e sezonit së ngrohjes qendrore. Minimumi i kam 5 tonë në depo, që mundet një kohë të gjatë ti përdorim deri sa të kryhet procedura e tenderimit”, tha Sedat Bajrami, drejtor i shkollës “Mushnikova”.
Aida Bajrami udhëton nga një fshat tjetër, për të vijuar mësimin në këtë shkollë, ndërsa thotë se, pavarësisht largësisë, dhe kushteve të motit, në shkollë është ngrohtë.
“Pesë apo gjashtë minuta i bëjmë me kombi, ndërsa me këmbë është larg, ndoshta një orë. Këtu kushtet i kemi të mira”, tha Bajrami.
Edhe mësimdhënësja Ifeta Bajrami udhëton me vite të tëra nga Prizreni, por mësimi nuk është penguar asnjëherë për shkak të ngrohjes thotë ajo.
“Nisem në ora 7 për në mësim, këtu mësimi fillon në 7.45, pak është i vështirë udhëtimi vetëm, varet prej rrugës, komunikacionit, këtu jo. Këtu kushte kemi, edhe kemi pas, do me thënë izolimi është në rregull, ngrohja në rregull”, tha Ifeta Ahmeti, mësimdhënëse.
Thuajse të gjitha shkollat e fshatrave malore mësimi është duke u zhvilluar normalisht, pasi kanë disa rezerva të lëndës djegëse nga viti i kaluar, deri sa të fillojë edhe furnizimi me dru dhe ‘pelet’, për këtë vit.
Përndryshe, reshjet e borës kanë vënë shtresa disa centimetërshe në Prevallë dhe fshatrat përreth, por rrugët janë të kalueshme.
