Aleanca për Ardhmërinë e Kosovës sot u ndal në Ferizaj. Në ditën e 21-të fushatës elektorale për zgjedhjet e 12 tetorit, kryetari i kësaj partie, Ramush Haradinaj, foli për siguri, paqe e investime.
Këto ishin temat mbi të cilat ai u përqendrua në takim me ferizajasit. Prandaj, ai tha se vota për AAK-në dhe Xhemile Murati Ademin, kandidaten për kryetare të Ferizajt nga kjo parti, është garanci për Kosovën dhe votë për një të ardhme më të mirë për të gjithë.
Ai tha se në listën e partisë që drejton, ka emra të dëgjuar të njerëzve të zot që i bëjnë ndër Ferizajt dhe mbarë Kosovës.
” Ne i kemi mbështet shumë projekte për Ferizajn me kosto të lartë, e nëse prapë marr përgjegjësi, ju premtoj se do të jem me ju, për arsye se ju jeni dëshmuar të zot, Ferizaj ka dëshmi që është vend i kompanive të suksesshme, e di rrugëtimin tuaj për atdhe e komb, Kosova ka nevojë për ju, vota juaj është dëshmi që duam të jemi në drejtimin e duhur me aleatët tojë, mos të harrojmë kush e donë kombin e donë Amerikën, mos të harrojmë kush na ka ndihmu”, ka thënë Haradinaj.
Derisa shprehu bindjen se AAK-ja është subjekt politik që ka bërë shumë për Ferizaj, kandidatja për kryetare të kësaj komune, Xhemile Murati Ademi, në këtë rast veçoi kryetarin e kësaj partie, Ramush Haradinajn.
“Ne jemi hisedar të suksesit, Ferizajn e presin shumë sfida të reja, ne do të hapim shkolla të reja, përkrahje në bursa, objekte sportive, do të punojmë për një Ferizaj ku shëndetësia është afër qytetarëve, do të kujdesemi të rritet stafi shëndetësor në raport me numrin e banorëve, e kështu do të lehtësojmë punën e mantel-bardhëve, do të ndërtojmë qendrën për personat e varur nga substancat narkotike…”, ka thënë Xhemile Murati-Ademi, kandidate për kryetare të Ferizajt nga AAK.
Në këtë takim elektoral mori pjesë edhe Xhavit Zariqi, i i cili është edhe kryesues i listës së AAK-së, për të cilën tha se është më premtuesja për qytetarët. Sipas tij, të gjithë, përfshirë edhe votuesit e AAK-së, kanë nderin që për lider të kenë një njeri të veçantë që është dëshmuar në të gjitha kohërat duke kontribuuar në luftë dhe liri.
Në tubim u prezantua lista garuese e AAK-së prej 43 kandidatësh për Kuvendin Komunal, derisa u premtua infrastrukturë, investime në kanalizim, arsim, shëndetësi, ekonomi, sport e shumë sektorë të tjerë, për çka edhe u kërkua dalje masive në zgjedhjet e 12 tetorit.
