Në kuadër të fushatës zgjedhore, kryetari i Nismës Socialdemokrate, Fatmir Limaj, ka zhvilluar një takim me banorët e fshatit Zoçishtë në Rahovec. Në këtë tubim, ai foli për rëndësinë e përfaqësimit qytetar në Asamblenë Komunale, duke theksuar potencialin e madh që ka kjo komunë për zhvillim dhe demokratizim. Ai tha Lista e NISMA Socialdemokrate është garancia që do të qeveriset me përgjegjësi dhe transparencë, duke vënë qytetarin në qendër të vendimmarrjes.
Nisma Socialdemokrate ka vazhduar fushatën zgjedhore në komunën e Rahovecit, ku kryetari i partisë, Fatmir Limaj, ka takuar qytetarë dhe disa nga kandidatët për asamble në këtë komunë.
Limaj e ka vlerësuar rolin e secilit, duke kërkuar mbështetje për programin e partisë së tij për Rahovecin.
“Kjo është një shenjë që kudo demokracia është një mundësi për secilin me dhënë kontributin e vet, me u kthyer dhe me u bërë zë i lagjes, i fshatit, i qytetit. Është një mundësi e mirë që në asamble ose në Kuvendin Komunal të Rahovecit të kemi zëra të ndryshëm përfaqësues të vizioneve të ndryshme. Jemi me një komunë shumë puntore e aktive dhe ata kanë nevojë shumë për zërin tuaj,” theksoi Limaj.
Limaj tutje tha se Rahoveci ka potencial të madh jo vetëm për zhvillimin ekonomik e social, por edhe për një zë ndryshe që reflekton interesat dhe kërkesat e qytetarëve.
“Unë besoj që këtu ka potencial dhe mundësi të mëdha për zhvillim në të gjitha drejtimet, por edhe për demokratizim dhe për një zë ndryshe,” shtoi ai.
Në këtë takim, Limaj u bëri thirrje banorëve që të angazhohen dhe të kontribuojnë për zhvillim të qëndrueshëm në komunën e tyre.
