Me bindjen se Suhareka dhe fshatrat e saj kanë shumë nevojë për projekte që ndihmojnë banorët për një jetë dinjitoze, Lidhja Demokratike e Kosovës mbajti tubim elektoral me qytetarët e kësaj komune.
Drejtues të kësaj partie thanë se kandidati I tyre për kryetar të komunës, është zgjidhja më e mirë që do të transformonte Suharekën dhe do të realizonte planet që nga infrastruktura e deri tek investimet më të mëdha, përfshirë arsim, shëndetësi e kulturë. Kryetari i LDK-së, Lumir Abdixhiku, kërkoi mbështetjen e qytetarëve të Suharekës, për Ardian Shalën, kandidatin e këtij subjekti politik për kryetar të komunës.
Sipas tij, Shala, me përvojën dhe përgatitjen e tij, është kandidati i duhur për ta çuar përpara këtë komunë.
Se është koha për një udhëheqje që përfaqëson vizionin e qytetareve te Suharekës, kjo sipas Abdixhikut, shihet tek mungesa e deritanishme e investimeve dhe zhvillimit. Prandaj ai tha se kjo komunë dhe banorët e saj, kanë nevojë për investime konkrete.
E për ta bërë këtë, Abdixhiku tha se Ardian Shala, ka vizion të qartë dhe merr përgjegjësi për tu shërbyer qytetareve me nder.
Planin dhe projektet para qytetarëve të Suharekës, i paraqiti Ardian Shala, kandidat i LDK-së për kryetar komune. Ai përmendi shtyllat mbi të cilat tha se është i fokusuar programi I tij për Suharekën, e që është i përqendruar jo vetëm në zhvilli, por mbi të gjitha edhe në energji të re, ku vizionin që përfaqëson është i qartë e konkret.
Ndër prioritetet e tij për Suharekën, tha se ka një sistem arsimor cilësor, shkolla e çerdhe te reja, mësim tërë ditor, qendër te re te mjekësisë familjare, shërbime publike dinjitoze, ujë të pijshëm, ndërtimin e unazës së qytetit e mbështetje ndaj fermerëve.
Në këtë tubim elektoral, u bë edhe prezantimi i kandidatëve të LDK-së për Kuvendin Komunal të Suharekës.
