Fotoreporteri francez, Antoni Lallican, 37 vjeç, u vra të premten në mëngjes në rajonin Donbas të Ukrainës lindore, në një sulm me dron.
Ngjarja është konfirmuar nga Federatat Evropiane dhe Ndërkombëtare të Gazetarëve dhe Sindikata Kombëtare e Gazetarëve të Francës.
Sipas raportimeve, në të njëjtin sulm u plagos edhe gazetari ukrainas Heorgiy Ivanchenko. Të dy ishin duke mbajtur jelekë mbrojtës me mbishkrimin “Press”, raporton France 24.
Ky është rasti i parë që një gazetar humb jetën nga një dron në Ukrainë që nga fillimi i pushtimit të plotë rus në vitin 2022. “Sot, në Ukrainë, kërcënimi kryesor për gazetarët, ashtu si për të gjithë civilët, janë dronet ruse që i ndjekin njerëzit,” tha Sergiy Tomilenko, president i Sindikatës Kombëtare të Gazetarëve të Ukrainës.
Rrethanat e incidentit, që ndodhi rreth orës 9:20 të mëngjesit, mbeten nën hetim.
Lallican ishte një fotoreporter me përvojë, me bazë në Paris, dhe puna e tij është publikuar në gazeta të njohura franceze dhe gjermane, si Le Monde, Le Figaro, Libération, Der Spiegel, Zeit dhe Die Welt. Ai kishte udhëtuar në Ukrainë që nga marsi i vitit 2022 dhe kishte dokumentuar gjerësisht pasojat e luftës, duke u fokusuar kryesisht te banorët e bazenit minerar të Donbasit.
Në janar 2024, Lallican fitoi Çmimin Victor Hugo për Fotografinë e Angazhuar për reportazhin e tij “Papritmas Qielli Errësoi”, mbi luftën në Ukrainë.
