Kryetari i Vetëvendosjes, Albin Kurti, i shoqëruar nga kandidati për kryetar të Mitrovicës së Jugut nga ky subjekt politik që vjen nga radhët e Guxo-s, Faton Peci, kanë mbajtur tubim elektoral në qytetin e Mitrovicës.
Në takim me mësimdhënësit e këtij qyteti, Kurti, duke iu bërë thirrje që ta votojnë Faton Pecin për kryetar, tha se veriu e jugu do të marrin frymën e zhvillimit me qeverisjen e tij.
“Për neve është prioritet kombëtar, edhe për Fatonin arsimi mbetet prioritet kombëtar. Po zbatojmë arsimin dual, po japim bursa si kurrë më herët. Arsimi publik është falas. Mitrovica e ka veç një çerdhe për fëmijë”, ka thënë Kurti.
Arbëri Nagavci nga Lëvizja Vetëvendosje tha se Mitrovica ka nevojë për përmirësimin e kushteve për qytetarët dhe ndërtimin e çerdheve e kushte moderne për mësim.
Kandidati për kryetar të Mitrovicës së Jugut, Faton Peci, tha se ky vend ka qenë vatër e dijes e arsimit, duke thënë se planprogrami i tij mësimdhënësit do të kenë një trajtim e kujdes të veçantë.
Peci tha se projekti që ai ka paraparë për qeverisjen e tij katërvjeçare do të mundësojë ndryshim rrënjësor në sistemin arsimor dhe përmirësim të kushteve për mësimdhënësit.
