Kryetari i Lëvizjes Vetëvendosje, Albin Kurti, gjatë tubimit elektoral në fshatin Skivjan të Gjakovës, tha se me qeverisjen e kësaj partie në Komunën e Gjakovës, qytetarët do të kenë më shumë mundësi për zhvillimin e projekteve të rëndësishme infrastrukturore, veçanërisht atyre hekurudhore. Ai premtoi gjithashtu mirëqenie për ta dhe vende të reja pune për të rinjtë.
“E rëndësishme është lidhja e Prishtinës me Durrësin si port detar, dhe kjo hekurudhë me portin e ri do ta ketë brenda saj edhe segmentin Gjakovë–Shkodër. Prandaj e kemi me shumë rëndësi që në Gjakovë, teksa ndërtojmë këtë projekt hekurudhor, të kemi profesionistë si Ardian Gola.
Gjithashtu, do të ketë mirëqenie sociale dhe çdo i ri do të ketë mundësi punësimi”, theksoi Kurti.
Ndërkohë, kandidati i Vetëvendosjes për kryetar të Komunës së Gjakovës, Ardian Gola, theksoi se Gjakova ka potencial të madh zhvillimor dhe se projektet hekurudhore do të kenë ndikim të drejtpërdrejtë në zhvillimin ekonomik të komunës.
“Nuk është vetëm investim në infrastrukturë, por një projekt strategjik që e shndërron Gjakovën në një qendër të rëndësishme që lidh dy vendet tona. Kjo hekurudhë do ta forcojë lidhjen ekonomike të qytetit dhe do të ndihmojë në zhvillimin e komunës dhe qytetarëve” tha ai.
Sipas Golës, prioritet i qeverisjes së ardhshme komunale do të jetë krijimi i zonave industriale, përmirësimi i shërbimeve publike si dhe investimet në arsim, shëndetësi, sport e kulturë.
