Aleanca për Ardhmërinë e Kosovës ka vazhduar fushatën elektorale për zgjedhjet komunale të 12 tetorit në Pejë.
Kreu i këtij subjekti, Ramush Haradinaj, ka premtuar se banorët e kësaj komune do të jenë prioritet i qeverisjes së kandidatit të tyre për kryetar, Ali Berisha.
“Bartësi i listës, Arberi është një model i njeriut, kryetari i yni i Pejës që po vjen, Ali Berisha, ma të mirat e Pejës në kohën më të keqe, ende pa filluar lufta ishte mjek i të gjithëve, afër të gjithëve, ka pasur kujdes në shërbim të të gjithëve, ishte aty ku ishin luftëtarët më të zot, deri në shikimin e fundit ishte aty doktori me ta. Me ‘99 kemi ardhur në Pejë, këtu është themeluar Aleanca, ishte këtu, ne nuk kemi ardhur në Pejë për neve, por për Pejën, e ky vend kur s’kishte hap të zhvillimit ka ardhur Ali Berisha. Jam vërtet i mahnitur nga punët që janë bërë në këto zgjedhje, por mos u ndalni deri më 12 tetor, e më 13 tetor nis puna”, tha Haradinaj.
Nën moton “Rikthimi për Pejën”, kandidati për kryetar të kësaj komune premtoi se me fitoren e AAK-së, Pejës do t’i kthehet drita.
“Duhet ndërmerret diçka në Pejë, qyteti ka nevojë për shumë ndryshim. Ne kemi një plan, në komunën tonë, bazuar në projektet tona dhe me njerëzit tonë, që ka edhe parti të tjera që e duan Pejën e duan ndryshimin. Kemi planifikuar një qarkore në qytet që ka me qenë shpëtim, kemi planifikuar parkingjet. Ne duhet të avancohemi, arsimit duhet t’i kthehet shkollave, kemi me bo autonominë e shkollave, ata vet do ta bëjnë menaxhimin në shkollën e tyre. Gjithashtu do të ketë shumë më shumë buxhet dhe infrastrukturë më të mirë, do të ketë 24 orë shërbime shëndetësore, në shumë ambulanca dy ndërrime do të funksionojnë”, tha Berisha.
Në këtë tubim gjithashtu u prezantuan edhe disa nga kandidatët për asamblenë komunale.
