“Lipjani ka qenë dhe është bastion i LDK-së”. Kështu u shpreh para përkrahësve të kësaj partie kryetari i Lidhjes Demokratike të Kosovës, Lumir Abdixhiku, i cili tha se për tri mandate me radhë, ky qytet është shndërruar në shembullin e qeverisjes së mirë.
“Nëse do që dikush të dijë se si është qeverisja e mirë, ai duhet të vijë në Lipjan, nëse dikush kërkon të shohë se si një komunë nga një vend periferik shndërrohet në qendër të zhvillimit, ai duhet të vijë në Lipjan, nëse dikush do të shohë se si punohet, le të vijë në Lipjan,” deklaroi Abdixhiku.
Kreu i LDK-së tha se partia që ai drejton tashmë e ka shembullin më të mirë të qeverisjes lokale, andaj Abdixhiku tha se në Lipjan fitorja e kësaj partie është e sigurt.
“Kështu ka qenë për tri mandate, kështu do të mbetet sërish, për tri mandate me radhë një qytet i harruar u shndërrua nën një vatër të zhvillimit, prosperimit, mirëqenies e përparimit, për tri mandate me radhë Lipjani i njerëzve të mbarë dhe punëtor u në shtëpi e mbarë dhe e qytetarëve të shumtë të cilët po jetojnë e po zhvillohen në qytetin e tyre të lindjes,” theksoi Abdixhiku.
Imri Ahmeti e kërkoi votën edhe për një mandat tjetër për kryetar në Lipjan, me premtimin se këtë komunë e presin edhe shumë projekte të hartuara nga ekipi i tij.
“Do ta funksionalizojmë mësimin tërë ditor në katër shkolla si pilot projekt, transporti falas për të gjithë nxënësit e shkollave të mesme, bursa për student dhe mundësi për praktikë me pagesë për student të sapodiplomuar, autoambulanca për secilën QMF, qendër për të moshuar me qëndrim ditor, do ta ndërtojmë qendrën për autizëm me qëndrim ditor,” tha Imri Ahmeti – kandidat për kryetar të Lipjanit.
Kandidati për kryetar të Lipjanit nga LDK-ja theksoi se investimet në infrastrukturën rrugore dhe në mbrojtje të ambientit janë ende të nevojshme për këtë komunë.
“Do të ndërtojmë ura të reja për në Prugovc dhe Gadime, do të vazhdojmë me ndërtimin e shtratit të lumenjve në Qallapek, Haraq i Vogël, Qylagë e të tjera, do të ndërtohen trotuaret dhe do të ndërtojmë çerdhe të reja në Lipjan,” deklaroi Ahmeti.
Me premtimin se do të rinovohen komplekset e vjetra banesore dhe do të ndërtohet pishina gjysmë olimpike, Ahmeti tha se bashkë edhe me ndërtimin e dy nënkalimeve moderne, njëri për këmbësor dhe tjetri për vetura, ky qytet do të ndryshojë.
