Fushatën elektorale për kryetare të Prishtinës, Besa Shahini nga Partia Socialdemokrate e Kosovës, e vazhdoi sot me një konferencë për media, duke u përqendruar te temat konkrete që ndikojnë në jetën e qytetarëve.
Shahini njoftoi se ka nisur një peticion për ndryshimin ligjor të tatimit në pronë, me qëllim që të aplikohet taksa për banesat e pashfrytëzuara. Sipas saj, tatimi do të duhej të paguhej nga ata që posedojnë banesa, por nuk i përdorin për banim.
“Si qeraja edhe blerja janë jashtëzakonisht të shtrenjta, dhe përkundër kësaj, rreth 27 mijë banesa në qytet janë krejtësisht të zbrazëta. Një pjesë e madhe e banesave të ndërtuara nuk është në përdorim, sepse përdoren më shumë si investim sesa për banim”, tha Shahini.
Ajo theksoi se çmimet e larta të banimit lidhen edhe me politika të tjera, si menaxhimi i banesave komunale dhe pajisja me certifikatat e pronës për banesat e palegalizuara.
Shahini gjithashtu foli për vështirësitë e çifteve të reja dhe të rinjve që duan të jetojnë në qytet, të studiojnë apo të fillojnë jetën e tyre të pavarur:
“Të rinjtë që duan të vijë në qytet, të sjellin talentet e tyre dhe të jetojnë këtu, e kanë të pamundur për shkak të çmimeve ekstremisht të larta të banimit”, tha ajo.
Kandidate e PSD-së tha se beson se brenda gjashtë muajve do të mblidhen nënshkrimet e nevojshme për këtë nismë, duke shpresuar që ndryshimi ligjor të ndihmojë në lehtësimin e kostove të jetesës për qytetarët e Prishtinës.
