Projekte kapitale, tërheqje të investimeve të huaja e zhvillim të turizmit rural ka premtuar kryetari i PDK, Memli Krasniqi, në tubimin e mbajtur në Rahovec.
Krasniqi tha se kjo komunë meriton një qeverisje të përgjegjshme, ndërsa shtoi se PDK ka kandidat për kryetar një personalitet me vizion të qartë e program konkret për Rahovecin.
“Ky vend e meriton një drejtim të ri, mjafton për ata që shëtisin nëpër Rahovec e shohin që diçka po mungon, ka potencial po s’ka njerëz, ka tokë po s’ka zhvillim të vërtetë, prandaj për këto arsye kemi vendosur që para qytetarëve të sjellim një kuadër të përgatitur dhe ku është Edon Cana,” ka thënë Krasniqi.
E kandidati për kryetar të Rahovecit nga radhët e PDK-së, Edon Cana, veçoi prioritetet e tij, duke filluar nga zhvillimi ekonomik lokal, mbështetja për bujqit dhe krijimi i kushteve dhe mirëqenies për qytetarët.
“Zhvillimi i turizmit rural dhe ky turizëm karakteristik bujqësorë dhe më së shumti në shpirtin e Rahovecit. Rahoveci 2035 do ta mundësojë që këtë potencial që ka komuna ta shndërrojë në zhvillim ekonomik, vitin e parë do të punojmë për t’i zgjidhur problemet bazike, uji, kanalizimi dhe gjitha nevojat, se pa ujë nuk ka turizëm. Xërxeni do ta bëjmë qendër ekonomike dhe tregtare duke shndërruar një zonë ekonomike prej 35 hektarë,” ka thënë Edon Cana, kandidat për kryetar të Rahovecit nga PDK.
Për ta bërë Rahovecin më të mirë dhe më ndryshe nga si është sot, kandidati i PDK-së për kryetar, Edon Cana, tha se kjo mund të arrihet nëse merr besimin e qytetarëve për ta udhëhequr komunën.
