Sot u zhvillua mbledhja e përgjithshme vjetore e aksionarit të Korporatës Energjetike të Kosovës (KEK), në prani të Bordit të Drejtorëve, të udhëhequr nga Valdrin Krasniqi, kryesues, si dhe menaxhmentit të lartë të korporatës, me kryeshefin Ekzekutiv Gramos Hashani.
“Në këtë takim mori pjesë edhe Getoar Mjeku, Zëvendësministër në detyrë i Ekonomisë dhe përfaqësuesi i aksionarit, me të cilin u prezantuan dhe u diskutuan raportet kyçe për vitin 2024: Raporti Vjetor i KEK sh.a., Raporti i Auditorit të Jashtëm mbi pasqyrat financiare dhe Raporti i performancës së menaxhmentit për periudhën raportuese”, thuhet në njoftim
Gjatë mbledhjes u diskutuan rezultatet e arritura dhe sfidat që korporata ka përballuar gjatë vitit të kaluar. Pavarësisht kushteve të vështira operative, KEK sh.a. thuhet se ka treguar stabilitet, profesionalizëm dhe përkushtim në sigurimin e furnizimit të qëndrueshëm me energji elektrike për vendin.
Në raport u theksua se KEK sh.a. ka realizuar me sukses furnizimin e energjisë elektrike për KESCO, për nevojat e konsumatorëve me shërbim universal, KOSTT dhe KEDS, për mbulimin e humbjeve në rrjetet e transmetimit dhe shpërndarjes dhe Termokos, me furnizim të pandërprerë të energjisë termike gjatë gjithë sezonit dimëror.
Gjithashtu u tha se, Divizioni i Prodhimit të Qymyrit (DPQ) ka përmbushur planin e prodhimit të djerrinës dhe qymyrit, duke furnizuar në mënyrë të qëndrueshme dy termocentralet Kosova A dhe Kosova B.
U ritheksua edhe përkushtimi për rritjen e sigurisë dhe efikasitetit në njësitë prodhuese, si dhe zhvillimi i projekteve kapitale dhe investimeve strategjike në përputhje me Strategjinë Kombëtare të Energjisë, duke përfshirë edhe kapacitetet nga burimet e ripërtëritshme të energjisë.
Në përmbyllje, Bordi i Drejtorëve dhe Menaxhmenti i KEK sh.a. konfirmuan gatishmërinë për të vazhduar me përkushtim realizimin e objektivave dhe misionit të korporatës, në sigurimin e furnizimit të qëndrueshëm, të besueshëm dhe ekonomik me energji për qytetarët e Kosovës.
