Kryeministri i Shqipërisë, Edi Rama, ka reaguar me një deklaratë të fortë pas ngjarjes tragjike të vrasjes së gjyqtarit Astrit Kalaja në Gjykatën e Apelit në Tiranë.
Në një postim në rrjetet sociale kryeministri Rama shprehu ngushëllimet e tij të thella. “Ngushëllime vëllazërore familjes së gjykatësit të ndjerë Astrit Kalaja dhe u prehtë në paqe” shkruan Rama.
Ai theksoi se ky akt kriminal kërkon një përgjigje të ashpër ligjore. “Agresioni kriminal mbi gjykatësin kërkon padyshim përgjigjen më ekstreme ligjore ndaj agresorit” deklaroi Rama, duke bërë thirrje për dënimin maksimal të autorit të dyshuar.
Kryeministri e konsideroi këtë tragjedi si një mundësi për reflektim të thellë mbi sistemin e sigurisë në gjykata.
“Por kjo tragjedi kërkon një reflektim për sistemin e sigurisë së brendshme të gjykatave, e cila përveçse sipas ligjit kërkon disa pajisje teknologjike, nuk mund të mbetet një çështje zgjedhjeje mes policish private në emër të pavarësisë së gjyqësorit”, u shpreh ai.
Rama gjithashtu e lidhi ngjarjen me problemin më të gjerë të armëmbajtjes pa leje në vend.
“Ndërkohë, kjo ngjarje tragjike besoj se është argumenti më i pakundërshtueshëm, për të mbështetur ashpërsimin domethënës në Kodin Penal të dënimit për armëmbajtjen pa leje dhe ngushtuar maksimalisht hapësirën për lojëra me afatet në dëm të mbrojtjes prej zjarrit të armëve të paligjshme”, shkruan Rama.
Ai shtoi një apel për reflektim shoqëror: “Lutem gjithashtu që ky moment kaq tronditës të nxisë edhe një reflektim për lehtësinë me të cilën trajtohet rëndom armëmbajtja pa leje në proceset gjyqësore.”
