Lidhja Demokratike e Kosovës ka mbajtur tubim elektoral në Istog. Nga atje lideri, Lumir Abdixhiku, tha se LDK-ja është krenare me qeverisjen në Istog.
Abdixhiku tha se zgjedhjet lokale nuk janë vetëm për një kryetar komune e për listë të Kuvendit Komunal, por për fatin e Republikës së Kosovës. Kreu i LDK-së tha se Istogu do të jetë pijetar në ringritjen e LDK-së.
“Istogu sot ka shkolla më të mira, rrugë më të mira, shërbime më të afërta, sepse LDK-ja e Iliri nuk e shohin politikën si karrierë, por i një shërbim. Iliri e sheh komunën, jo si pronë, por si amanet, amanet të Fadilit, të Hakiut, të Shabanit, amanet të të gjithë patriotëve të mëdhenj të kësaj ane. Është njeri i fjalës e i besës. Iliri nuk është vetëm në këtë rrugëtim, pas tij qëndron një ekip i madh, lista e LDK-së për Kuvend Komunal”, tha Abdixhiku para përkrahësve të LDK-së në këtë komunë.
Kandidati për kryetar nga LDK-ja, Ilir Ferati, falënderoi qytetarët për mbështetjen dhe besimin.
“Besimi në LDK është trashëgimi rugoviste që e ka rrënjën këtu, në Istog. Kemi qenë bashkë në çdo fshat e çdo lagje. Me përkrahjen tuaj, më 12 tetor do të marrim fitoren, për të vazhduar rrugën e presidentit tonë”, tha Ferati.
Abdixhiku dhe Ferati kërkuan nga istogasit mbështetje edhe për listën e kandidatëve për Kuvendin Komunal.
