Një edukatore në Lipjan është arrestuar nga Policia e Kosovës pas denoncimit për dhunë ndaj një fëmije të moshës një-vjeçare.
Lajmin e arrestimit e ka konfirmuar për RTKlive zëdhënësja e Policisë për rajonin e Prishtinës, Flora Ahmeti.
“Po pas përfundimit të disa veprimeve hetimore është arrestuar personi i dyshuar dhe me vendim të prokurorit e njëjta është dërguar në mbajtje”, ka bërë të ditur Ahmeti.
Rasti u bë publik nga daja i fëmijës, i cili përmes rrjeteve sociale tha se vajza ka marrë lëndime serioze në fytyrë. Ai pretendon se ngjarja ka ndodhur pasi fëmija është rrëzuar nga mësuesja Behare Gashi.
“Si dajë, jam i tronditur dhe shumë i lënduar për mbesën time. Sot në mëngjes, në çerdhe, një mësuese, Behare Gashi, e ka rrëzuar për tokë dhe ajo ka marrë lëndime serioze në fytyrë. Kjo nuk duhet t’i ndodhë asnjë fëmije! Fëmijët duhet të jenë të mbrojtur në shkollë, jo të dëmtohen nga ata që duhet t’i edukojnë,” shkroi familjari në reagimin e tij, duke kërkuar drejtësi dhe përgjegjësi për këtë veprim të papranueshëm.
