Radiotelevizioni i Kosovës do të organizojë një ngjarje prezantuese për edicionin e tretë të Festivalit të Këngës.
Një muaj para nisjes së ngjarjes kulturore, organizatorët do të mblidhen si shenjë mirënjohje për bizneset që përkrahën këtë organizim dhe si inkurajim që të vazhdojnë përkrahjen.
“Pjesëmarrja juaj në këtë aktivitet është shumë e çmuar për ne, pasi ju konsiderojmë partnerë të rëndësishëm në përkrahjen dhe zhvillimin e iniciativave kulturore në vend”, thuhet në ftesën e ngjarjes.
Ngjarja do të organizohet këtë të enjte duke filluar nga ora 11:30 te hotel “Merkuri”.
Sivjet në “Fest 3” do të marrin pjesë 20 këngë garuese, të cilat premtojnë laramani muzikore dhe pasuri artistike. Drejtori artistik i ngjarjes, Florent Boshnjaku, ka premtuar emra eminentë të skenës si mysafirë që do të pasurojnë tri netët e festivalit.
Në anën tjetër skenarist i Festivalit të Këngës këtë vit është Genc Salihu, i cili vitin e kaluar ishte në pozitën e prezantuesit.
