Komandanti i misionit të udhëhequr nga NATO, gjeneralmajor Özkan Ulutaş, ka pritur sot në selinë e KFOR-it në Kampin Film City në Prishtinë përfaqësuesin ushtarak të Mbretërisë së Bashkuar në NATO dhe Bashkimin Evropian, gjeneral-lejtnant Sir Ian Cave.
Në këtë takim, dy gjeneralët diskutuan rreth situatës së sigurisë në Kosovë dhe rajon dhe rolin e KFOR-it.
“Të dy gjeneralët diskutuan për situatën aktuale të sigurisë në Kosovë dhe në rajon në përgjithësi, duke theksuar rolin e KFOR-it në nxitjen e stabilitetit rajonal dhe në mbështetjen e dialogut politik konstruktiv,” thuhet në njoftimin e KFOR-it.
Tutje, bëhet e ditur se Gjeneral Ulutaş shprehu mirënjohjen e tij për mbështetjen e vazhdueshme dhe të çmuar të Mbretërisë së Bashkuar në ruajtjen e një mjedisi të sigurt dhe të qetë për të gjithë njerëzit në Kosovë.
KFOR-i rithekson se vazhdon të zbatojë mandatin e tij – të bazuar në Rezolutën e Këshillit të Sigurimit të Kombeve të Bashkuara, për të kontribuar në një mjedis të sigurt dhe të qetë për të gjithë njerëzit dhe komunitetet që jetojnë në Kosovë dhe për lirinë e lëvizjes, në çdo kohë dhe në mënyrë të paanshme.
“KFOR punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), secili në rolin e vet si përgjegjës për sigurinë,” përfundon njoftimi.
