Pas vendimit të Qeverisë së Kosovës për ndarjen e 26 milionë eurove për studentët, nga 100 si mbështetje e njëhershme me rastin e fillimit të vitit akademik, ka reaguar kryetari i Partisë Demokratike të Kosovës, Memli Krasniqi.
Kreu i PDK-së ka thënë se mbështetja nuk është e sinqertë, por përpjekje e hapur për blerje votash, meqë, sipas tij, po bëhet vetëm pesë ditë para zgjedhjeve.
“Kryeministri në largim, i cili tashmë ka humbur çdo legjitimitet, duket se po e përjeton panikun nga humbja e madhe që e pret të dielën. Pas katër vitesh dështimesh në qeverisje dhe degradimi të sistemit arsimor, ai sot vendosi të ndajë 26 milionë euro, nga 100 euro për student, vetëm pesë ditë para zgjedhjeve. Kjo nuk është mbështetje e sinqertë për studentët, por përpjekje e hapur për blerje vote”, ka shkruar Krasniqi.
Por, ai ka ftuar studentët që t’i marrin mjetet, sepse, siç thotë, janë të taksave të familjeve të tyre.
“Megjithatë, ky është një tjetër gjykim i gabuar për studentët kosovarë, sepse ata as nuk blihen e as nuk shiten. Unë i ftoj studentët që t’i marrin ato mjete, që janë nga taksat e familjeve të tyre, por të dielën ta përdorin votën e tyre për ta ndëshkuar një kryeministër që ka rrezikuar të ardhmen e tyre dhe të shtetit”, thuhet në reagimin e Krasniqit ndaj vendimit qeveritar.
