Gjykata Supreme e ka refuzuar ankesën e Iniciativës Qytetare për Skenderaj, të kandidatit Sokol Halili cili e kishte atakuar në këtë gjykatë vendimin e Panelit Zgjedhor për Ankesa dhe Parashtresa që me 23 shtator kishte gjobitur atë me 5 mijë e 500 euro për shkak të gjuhës që kishte përdorur ndaj kandidatit nga PDK-ja, Sami Lushtaku.
Halili përmes ankesës e kishte kontestuar ligjshmërinë e vendimit ë PZAP-së, duke kërkuar nga Supremja që ta anulojë atë.
“Paneli, pas vlerësimit të shkresave të ofruara si provë materiale në ankesë, të cilat janë ofruar nga Subjekti politik Partia Demokratike e Kosovës, vëren se kandidati për kryetar të Skenderajt nga subjekti politik Iniciativa Qytetare për Skenderaj Sokol Halili, përmes llogarisë së tij në rrjetin social Facebook ka përdorur shprehjet si “kriminel”, “terrorist”, “tiran”, “shok i Milan Radoiçiqit”, duke iu drejtuar kështu kandidatit të PDK-së për kryetar të Komunës së Skenderaj, Sami Lushtaku, vëren se e njëjta është e bazuar, sepse përdorimi i një gjuhe të tillë është në kundërshtim me nenin 34 paragrafi 1, pika 1.11, të LZP-së, me të cilën përcaktohet”, thuhet në vlerësimin që PZAP-ja i ka bërë ankesës së PDK-së.
Gjykata Supreme e Kosovës e ka pranuar në tërësi si të drejtë dhe të bazuar qëndrimin juridik të PZAP-së.
“Gjykata Supreme vlerëson se dënimi i shqiptuar këtij subjekti politik në lartësi prej 5,500.00 €, është i drejtë dhe i ligjshëm, për faktin se çështja ka të bëjë edhe me recidivizëm, sepse ky subjekt politik është gjobitur edhe më herët për gjuhë të pa përshtatshme në fushatë zgjedhore”, thuhet në aktgjykimin e Supremes për këtë çështje.
