Sezoni i ngrohjes në shumë objekte të Prishtinës nis që sot, nga “Termokos”, tetë ditë para afatit zyrtar të ndërmarrjes. Ndërmarrja, pasi ka përfunduar të gjitha përgatitjet e nevojshme dhe në koordinim të ngushtë me KEK-un, ka filluar të marrë energji termike për të nisur furnizimin.
Siç bëhet e ditur nga Termokos, kjo është hera e parë në historinë e ekzistimit të ndërmarrjes, që sezoni ngrohës nisë 8 ditë para afatit të zakonshëm për fillimin e furnizimit, si reagim i menjëhershëm ndaj përkeqësimit të motit dhe në harmoni të plotë me ligjet në fuqi, përkatësisht me rregulloren e ZRRE-së për furnizim me energji.
“NP Termokos dhe KEK-u po hyjnë në sezonin e 10-të bashkëpunimit të suksesshëm, përmes të cilit po sigurohet një furnizim i qëndrueshëm dhe cilësor për mbi 25 mijë konsumatorë,” thuhet në njoftimin e ndërmarrjes.
“Duke qenë se sistemi i ngrohjes është shumë kompleks dhe delikat, procesi i fillimit të operimit do të zhvillohet me kujdes të shtuar, duke e ngritur gradualisht kapacitetin e pranimit dhe shpërndarjes së energjisë termike. Andaj, kërkojmë mirëkuptimin e konsumatorëve tanë, ngase nevojiten disa orë derisa ngrohja të arrijë në radiatorët e tyre,” përfundon njoftimi.
