Kryetari i Lëvizjes Vetëvendosje, Albin Kurti gjatë tubimit zgjedhor në Fushë Kosovë, theksoi nevojën për transformim e Fushë Kosovës dhe përmirësim të jetës së qytetarëve të saj duke filluar qe nga furnizimi i fshatrave me ujë të pijshëm e me ngrohje qendrore.
“Qeverisja jonë po jep lajmin e mirë: uji po vjen në Fushë Kosovë.Ky ujë nuk është vetëm një investim infrastrukturor, por një e drejtë themelore për qytetarët. Uji që vjen nga Liqeni i Ujmanit, përpunohet në Shkabaj dhe shpërndahet nëpër krojet e banorëve. Një meritë e veçantë për këtë realizim i takon Valon Prebrezës, i cili është angazhuar shumë për të siguruar që investimet e qeverisë të realizohen sa më mirë dhe sa më shpejt,” tha ai.
Edhe kandidati i Vetëvendosjes për kryetar të Fushë Kosovës, Valon Prebreza tha se në qeverisjen e tij, do të ofrohen zgjidhje për problemet me të cilat ballafaqohen çdo ditë qytetarët e Fushë Kosovës.
“Zhvillimi duhet të bëhet gjithmonë sipas një vizioni.Nuk mund të realizojmë investime pa infrastrukturë përcjellëse. Ne nuk jemi kundër ndërtimit, por do të ndërtojmë në mënyrë të përgjegjshme për hir të qytetarëve, duke siguruar se në çdo hapësirë e ndërtuar të bëhet e jetueshme për banorët,” shtoi ai.
LVV premtoi gjithashtu ndërtimin e sheshit, investime në arsim dhe edukim të hershëm, shëndetësi dhe fusha të tjera.
