Problemet akute të Prishtinës do të gjejnë shumë shpejt zgjidhje, thanë drejtues të Partisë Demokratike të Kosovës në takim me banorët e lagjes Dardania. Memli Krasniqi, kryetar i kësaj partie, tha se Uran Ismaili, kandidat për kryetar të Prishtinës nga ky subjekt politik, ka program e projekte që do t’u japin fund shumë telasheve të banorëve të kryeqytetit.
Ndërsa Ismaili tha se programi që ai paraqet është i qartë dhe shumë konkret, pasi, mbi të gjitha, është hartuar mbi bazën e nevojave të prishtinasve, nga bashkëbisedimi i vazhdueshëm që kishte me ta.
Kandidati për kryetar të Prishtinës nga radhët e Partisë Demokratike të Kosovës, Uran Ismaili, zgjodhi sot lagjen Dardania për tubim elektoral.
Nga atje u tha se ajo që e dallon këtë fushatë nga të tjerat janë kërkesat e qytetarëve për një Prishtinë ndryshe, e këtë ndryshim ata e premtuan pas 12 tetorit.
Kryetari i Partisë Demokratike të Kosovës, Memli Krasniqi, e kërkoi votën e banorëve të lagjes Dardania për kandidatin e partisë së tij për kryetar të Prishtinës, Uran Ismaili.
Krasniqi tha se kryeqytetit, të ngulfatur nga trafiku dhe ndërtimet e pakontrolluara, i duhet zbatimi i plan-programit të ekipit të Uran Ismailit, ku premtoi se shërbimi i tij nuk do të njohë dallime partiake.
“Kjo çka ka ndodhë gjatë këtyre viteve është vërtet më shumë sesa një fushatë. Kjo çka ka ndodhë gjatë javëve të fundit, kjo energji, kjo mbështetje, më shumë është kthyer në një lëvizje të qytetarëve për një Prishtinë ndryshe. Dhe ajo që sot e them me bindje të plotë është se kjo lëvizje qytetare për ndryshim e ka një emër. E ka një emër dhe një numër, emrin e ka Uran Ismaili”, tha Krasniqi.
Ndërsa kandidati për kryetar të Prishtinës, Uran Ismaili, tha se për lagjet e qytetit dhe fshatrat, projektet janë realizuar mbi kërkesat e banorëve, të cilët kanë kërkuar rrugë me ndriçim, parqe të pastra dhe trotuare të liruara.
“Në çdo vend ku kam shku, ju kam thënë që programi jonë është i bazuar në kërkesat tona, në njerëzit e thjeshtë të Prishtinës, në njerëzit e zakonshëm të Prishtinës, në njerëz që e dinë që liqeni dhe treni elektrik nuk janë çka na duhen, por na duhen rrugët me ndriçim, trotuaret, çerdhet, shkollat, qentë endacakë të larguar, që pastërtia të jetë në nivel. Na duhet një jetë funksionale”, tha Uran Ismaili, kandidat për kryetar të Prishtinës.
Ismaili premtoi se tri nga 10 vendimet e para si kryetar do të jenë hapja e sheshit Xhorxh Bush, fillimi i procedurave për vendosjen e 200 oficerëve të sigurisë në shkolla dhe krijimi i task-forcës për ndërtimin e spitalit të Prishtinës.
