Përfaqësuesit e Administratës Tatimore të Kosovës (ATK) kanë mbajtur një takim me përfaqësues të institucioneve shtetërore, komunitetit të bizneseve dhe organizatave profesionale të kontabilitetit dhe auditimit. Takimi kishte për qëllim forcimin e bashkëpunimit ndërinstitucional dhe nxitjen e veprimeve konkrete në fushën e edukimit tatimor dhe zhvillimit profesional.
Në fjalën e tij hyrëse, drejtori i përgjithshëm Mentor Hyseni theksoi se qëllimi i ATK-së është që koordinimet formale të shndërrohen në bashkëveprim të mirëfilltë dhe me ndikim të prekshëm, duke ndërtuar ura të qëndrueshme bashkëpunimi ndërmjet institucioneve publike dhe sektorit privat. Ai shtoi se administrimi tatimor duhet të perceptohet si partneritet për zhvillim të qëndrueshëm ekonomik.
Drejtori i Përgjithshëm nënvizoi gjithashtu se ATK do të fokusohet më shumë në edukimin e tatimpaguesve, me synim që të ketë më pak ndëshkime.
“Një qytetar apo biznes i mirëinformuar është kontribuesi më i mirë i tatimeve, sidomos kur kupton se këto mjete kthehen në interes të publikut përmes një rishpërndarjeje të drejtë dhe të barabartë,” theksoi ai.
Në këtë drejtim, ATK dhe partnerët e saj do të punojnë së bashku në edukimin e të rinjve si brez i ardhshëm me ndikim pozitiv në tregun tatimor, si dhe në përgatitjen e stafit të ri profesional.
Përfaqësuesit e institucioneve dhe organizatave pjesëmarrëse vlerësuan lart gatishmërinë e ATK-së për bashkëpunim dhe partneritet, duke theksuar se bashkëpunimi i rregullt dhe shkëmbimi i informacionit janë thelbësorë për luftimin e evazionit fiskal dhe krijimin e një tregu më të drejtë e konkurrues.
Në përmbyllje të takimit, Hyseni theksoi se bashkëpunimi nuk është vetëm mënyra më e mirë për të arritur suksesin, por e vetmja mënyrë për të ndërtuar besim të qëndrueshëm dhe rezultate afatgjata në shërbim të publikut.
