Para përkrahësve në Kaçanik, nënkryetari i PDK-së , Bedri Hamza, tha se PDK është e vetmja forcë politike që do t’i zgjidhë problemet me të cilat ballafaqohen qytetarët . Ai theksoi se kjo komunë do të vazhdojë të jetë bastion i PDK-së, duke shtuar se kjo do të vërtetohet më 12 tetor me Sabedin Vishin, si dëshmi e lidhjes së fortë mes Kaçanikut dhe PDK-së, dhe se, sipas Hamzës, fitorja e Vishit do te jetë një hap i ri drejt zhvillimit të komunës dhe përmirësimit të jetës së qytetarëve.
“Fitoraj e PDK-së është e sigurt. Kaçaniku gjithmonë ka qenë kështjellë e kësaj partie. Sabedin Vishi është një udhëheqës vizionar, i përkushtuar ndaj qytetarëve, është një personalitet që mëshiron vlerat më të mira profesionale. Menaxher i aftë, i palodhur, i pranishëm në terren dhe pranë qytetarëve. Ai do të sjellë ndryshime pozitive konkrete. Një kryetar komune duhet të ketë integritet moral dhe ndjeshmëri njerëzore dhe Sabedini i ka të gjitha këto”, tha Hamza.
Na anën tjetër kandidati i PDK-së për kryetar të Kaçanikut, Sabedin Vishi, tha se platforma e tij është më e mira për mirëqenien e gjithë kaçanikasve, andaj bëri thirrje që ta votojnë për të parin e komunës. Ai tha se nga 1 janari të gjithë nxënësit e shkollave të mesme do ta kenë transportin falas.
“Nga 1 janari të gjithë të posalindurit do të subvencionohen me nga 200 euro. Kemi ndarë buxhetin për punë sociale, do te ketë rritjen e numrit të mjekëve dhe infermierëve për pacientë. Do të kemi 500 mijë euro subvencione dhe 300 mijë euro për kanale të ujitjes dhe punë fushore”, tha Sabedin Vishi, kandidat për kryetar të Kaçanikut nga PDK.
Vishi, po ashtu, përmendi investimet në infrastrukturë, shërbime publike dhe sektorin e bujqësisë, që, sipas tij, do ta kthejnë Kaçanikun në një komunë shembull për zhvillim.
Ai foli për ish krerët e UÇK-së që po mbahen në Hagë, duke thënë se PDK ka detyrë të jetë zëri i tyre dhe mbrojtës në emër të Thaçit e Veselit ne do të qëndrojmë të bashkuar krenar e të vendosur, sepse PDK lindi në sakrifica e përballje, sot kemi nevojë më shumë unitet.
