Misioni i OSBE-së në Kosovë ka reaguar ashpër pas vendimit të disa anëtarëve të Komisionit Qendror të Zgjedhjeve për të abstenuar ose votuar kundër kërkesave për akreditim të mediave në gjuhën serbe për mbulimin e zgjedhjeve lokale që do të mbahen të dielën, më 12 tetor.
Në deklaratën e lëshuar sot, OSBE shpreh “zhgënjim të thellë” lidhur me këtë vendim, duke theksuar se një proces zgjedhor i drejtë dhe transparent varet nga “qasja e hapur dhe e barabartë për të gjitha mediat që të vëzhgojnë, raportojnë dhe informojnë publikun mbi zhvillimet zgjedhore”.
Misioni thekson se ndalimi i akreditimeve mbi bazën e përkatësisë së perceptuar komunitare, gjuhësore apo redaktoriale “pengon gazetarët në ushtrimin e detyrave të tyre profesionale” dhe se qasja në informacion në gjuhët e komuniteteve “përbën një aspekt themelor të kornizës shumetnike dhe demokratike të Kosovës”.
“Sigurimi i mundësive të barabarta për të gjitha mediat është thelbësor për ruajtjen e besimit të publikut në procesin zgjedhor, për shmangien e perceptimeve për praktika diskriminuese dhe për mbështetjen e pjesëmarrjes së informuar të të gjitha komuniteteve”, thuhet në reagimin e OSBE-së.
Në fund, Misioni në Kosovë riafirmon përkushtimin për të promovuar dhe mbrojtur “lirinë e shprehjes, pluralizmin mediatik dhe qasjen e barabartë në informacion për të gjitha komunitetet”, duke u bërë thirrje partive politike që t’u përmbahen këtyre vlerave.
