Që nga tetori i vitit 2023, sulmet izraelite në Rripin e Gazës kanë vrarë gati 67,200 palestinezë, shumica prej tyre gra dhe fëmijë, dhe bombardimet intensive e kanë bërë zonën pothuajse të pabanueshme, me uri dhe sëmundje të përhapura.
Presidenti turk, Recep Tayyip Erdogan, përshëndeti marrëveshjen e armëpushimit të arritur midis Izraelit dhe lëvizjes palestineze Hamas, raporton Anadolu.
“Jam jashtëzakonisht i kënaqur që negociatat midis Hamasit dhe Izraelit, të mbajtura në qytetin egjiptian Sharm el-Sheikh me kontributin e Turqisë, përfunduan me arritjen e një armëpushimi në Gaza”, shkroi Erdogan në platformën sociale turke NSosyal.
“Falënderoj sinqerisht Presidentin e Shteteve të Bashkuara të Amerikës, Donald Trump, i cili tregoi vullnetin e nevojshëm politik për të inkurajuar qeverinë izraelite të pranojë armëpushimin, si dhe vendet tona vëllazërore, Katarin dhe Egjiptin, për mbështetjen e tyre të rëndësishme në arritjen e marrëveshjes”, shtoi presidenti turk.
Mbështetje e vazhdueshme për procesin e paqes
Erdogan theksoi se Ankaraja do të monitorojë nga afër zbatimin e armëpushimit të rënë dakord dhe do të vazhdojë të kontribuojë në këtë proces.
