Agjencia e Ushqimit dhe Veterinarisë së Kosovës (AUV) ka vendosur masë ndalese të përkohshme për importin e kafshëve të gjalla të llojit gjedhë, dele dhe dhi nga Mali i Zi, pas konfirmimit të shpërthimit të sëmundjes virale “Gjuha e Kaltër” (Bluetongue – BT) në territorin e këtij shteti fqinj.
Vendimi vjen pas njoftimeve të publikuara në sistemet ndërkombëtare të informacionit veterinare, ADIS dhe WAHIS, ku është raportuar për rastet e konfirmuara të kësaj sëmundjeje.
“Për të parandaluar përhapjen e sëmundjes në territorin e Republikës së Kosovës, autoritetet kufitare, përfshirë Policinë e Kosovës, Doganat dhe AUV janë urdhëruar të zbatojnë masa të shtuara kontrolli në të gjitha pikat kufitare dhe të ndalojnë hyrjen e kafshëve të gjalla të përmendura nga Mali i Zi”, thuhet në njoftimin e AUV-it.
AUV thotë se të gjitha institucionet përkatëse janë të obliguara të bashkëpunojnë dhe të ndërmarrin veprime të menjëhershme për të mbrojtur shëndetin e kafshëve dhe për të ruajtur sigurinë e sektorit bujqësor.
Çfarë është sëmundja “Gjuha e Kaltër”?
“Gjuha e Kaltër” është një sëmundje virale e transmetueshme përmes pickimit të insekteve të llojit Culicoides (mushkonja).
Ajo prek kryesisht ruminantët shtëpiak – gjedhë, dele dhe dhi – me delet që janë më të ndjeshme ndaj sëmundjes.
Gjedhët, megjithëse mund të mos shfaqin simptoma të rënda, shërbejnë si rezervuar i virusit.
Sëmundja nuk është zoonotike dhe nuk transmetohet te njerëzit, pra nuk paraqet rrezik për shëndetin publik.
