Fishkëllima të forta shpërthyen në Sheshin e Pengjeve në Tel Aviv kur i dërguari i SHBA-së, Steve Witkoff, përmendi emrin e kryeministrit izraelit Benjamin Netanyahu në fjalimin e tij. Ndërsa Witkoff iu drejtua mijëra izraelitëve të mbledhur që valëvitnin flamuj amerikanë, çdo përmendje e Presidentit të SHBA-së, Donald Trump, shkaktoi duartrokitje të zjarrta, shkruan CNN.
Por kur Witkoff u përpoq të fliste për Netanyahun, turma iu përgjigj me valë fishkëllimash të zhurmshme. Sa herë që ai përpiqej të shprehte mirënjohjen e tij ndaj udhëheqësit izraelit dhe kryenegociatorit të tij, Ron Dermer, turma e ndërpriste. Më në fund, Witkoff tha: “Djema, më lejoni ta përfundoj këtë mendim; më besoni, ata ishin thelbësorë për këtë.”
Kritikët e Netanyahut e akuzojnë atë për zgjatjen e luftës dhe shmangien e përgjegjësisë për mangësitë e sigurisë që çuan në sulmin e 7 tetorit. Ai akuzohet gjithashtu për sabotimin e përsëritur të negociatave për lirimin e pengjeve dhe përfundimin e luftës. Ndryshe nga Witkoff dhe Kushner, Netanyahu nuk e ka vizituar kurrë Sheshin e Pengjeve, i cili ka qenë një pikë qendrore mbledhjeje gjatë dy viteve të fundit.
Vërshëllimat drejtuar kryeministrit kanë shkaktuar reagime të ashpra nga aleatët dhe mbështetësit e tij. Zëvendëskryeministri dhe Ministri i Drejtësisë Yariv Levin e quajti incidentin “një turp të madh”. “Ishte një shfaqje e turpshme e mosmirënjohjes së tmerrshme ndaj Netanyahut, i cili e udhëhoqi shtetin e Izraelit përmes një prej periudhave të tij më të vështira dhe arriti arritjet e mëdha që kemi parë gjatë dy viteve të fundit”, tha Levin.
