Presidenti i Serbisë, Aleksandar Vuçiç, i informoi qytetarët se morën “lajme zhgënjyese” nga Rusia, duke pasur parasysh se i ofruan një kontratë gazi vetëm deri në Vitin e Ri, edhe pse marrëveshja origjinale ishte e ndryshme.
Vuçiç tha se Serbia duhej të merrte një kontratë afatgjatë për gazin në maj të këtij viti, por se kjo u shty për njëfarë kohe dhe tani atij iu tha se do ta merrte kontratën vetëm deri në fund të këtij viti.
“Ka një lajm tjetër që vjen nga Moska ose Petersburgu (selia e Gazpromit), cilado që të preferoni, se na kanë ofruar një kontratë gazi deri në Vitin e Ri. Thashë se ky është një lajm shumë zhgënjyes për ne, sepse duhej të përfundonim një kontratë afatgjatë trevjeçare deri në maj. Ne ishim më shumë se një partner i drejtë dhe i besueshëm në çdo kuptim, dhe të mos flasim për faktin se Serbia hoqi dorë nga arbitrazhi dhe shumë gjëra të tjera për të ruajtur miqësinë dhe marrëdhëniet e partneritetit”, tha Vuçiç për TV Informer.
Sanksionet e vendosura ndaj Gazpromit janë arsyeja pse Rusia i “kthen shpinën” Vuçiçit, duke pasur parasysh se rusët kanë frikë se Vuçiç mund t’i nënshtrohet presionit perëndimor për të shtetëzuar NIS-in dhe për t’u çliruar nga pronësia ruse.
“Pse deri në Vitin e Ri? Logjika është e thjeshtë dhe nuk do ta fsheh, sepse ata duan të na thonë ‘epo, nëse filloni të shtetëzoni NIS-in ose ndonjë gjë tjetër, ne mund ta ndërpresim gazin më 31 dhjetor’. Dhe ky është një mesazh shumë, shumë i keq për mua në çdo kuptim”, tha Vuçiç.
Ai shtoi se Serbia nuk kishte në plan të shtetëzonte NIS-in.
