Tetë kërpudha matsutake, ndër më të çmuarat në kuzhinën japoneze, u shitën për një shumë marramendëse prej 850,000 jenësh, ekuivalente me 4,850 euro, gjatë ankandit të parë të sezonit në tregun e qytetit Tambasasayama në prefekturën Hyogo.
Shitja rekord, e nxitur pjesërisht nga “tarifat tradicionale të urimit” të rezervuara për korrjen e parë të vjeshtës, u fitua nga ryokani i njohur Kinmata, i njohur për kuzhinën e tij të rafinuar japoneze të rrënjosur në traditën lokale.
Ankandi i hapjes u zhvillua gjashtë ditë më herët se vitin e kaluar, me kërpudhat në shitje ende në fazën e sythave, me gjatësi midis 6.5 dhe 11 centimetra. Sipas mediave lokale, loti, me një peshë totale prej 263.5 gramë, ishte më i rëndi ndër të korrat e para sezonale të regjistruara që nga viti 2018, viti kur u hap tregu. Ankandisti dhe menaxheri i tregut Tambasasayama, Tomoharu Iseki, është optimist, duke thënë se sezoni premton të jetë i bollshëm falë shirave që ranë pas festivalit veror Obon në mesin e gushtit, ndërsa toka malore ka ruajtur një nivel të mirë lagështie, ideal për këtë varietet kërpudhe.
Edhe pse matsutake zakonisht shitet për 100,000 deri në 150,000 jen për kilogram, ekuivalente me një vlerë mesatare prej 700 eurosh, vlera e korrjes së parë u rrit ndjeshëm gjatë ankandit, me organizatorin e ankandit që rriti me shpejtësi ofertat ndërsa ra zilja e hapjes.
Noritsugu Yoshimura, shefi ekzekutiv i kuzhinës në Kinmata, deklaroi me kënaqësi: “Ne shërbejmë kërpudha matsutake nga e gjithë Japonia, por ato që rriten këtu dallohen për aromën dhe shijen e tyre intensive.” Riokani planifikon t’u shërbejë kërpudhat e pjekura në skarë klientëve që do të qëndrojnë aty gjatë natës.
