Kryeprokurori i Prokurorisë Themelore në Prishtinë, Zejnullah Gashi, tha se incidenti në Komoran nuk ka të bëjë me procesin zgjedhor që po zhvillohet sot
“Incidenti në fjalë nuk ka të bëjë me procesin zgjedhor, ka të bëjë me tre të dyshuar që kanë precedent penal dhe nuk lidhet me procesin zgjedhor. Nuk dihen në detaje, por sipas informative të para që kemi, kjo lidhet me një mosmarrëveshje të mëhershme para tri javësh, të njëjtit janë të dyshuar për grabitje e e vepra penale ordinere dhe nuk lidhen me procesin zgjedhor”, tha Gashi.
Tutje prokurori i Themelores në Prishtinë, tha se e rëndësishme është që ky rast nuk cenon integritetin e procesit zgjedhor.
“Janë tre persona të involvuar, të tre personat sipas informatave që ne i posedojmë të njëjtit kanë të kaluar kriminale. Nuk ka asnjë person të lënduar, mirëpo ka dëmtim prone pasi të njëjtit fillimisht janë goditur me disa shufra metali që kanë dëmtuar veturën këtu afër dhe njëri nga personat e dyshuar nga brenda ka gjuajtur me armë”. Ai tha se po i marrin kamerat e pasi t’i shohin ato do të dalin me detaje të tjera.
Për rrahjen e të shtënat e armës që ka pasur sot në rreth orës 14:30 në rrugën “Shpëtim Robaj” në Komoran, e konfirmoi për RTKlive, zëdhënësja e Policisë së Kosovës për rajonin e Prishtinës, Flora Ahmeti, që tha se nga rasti nuk ka të lënduar.
“Sot rreth orës 14:30 është pranuar informata për një rrahje dhe të shtëna armësh në rrugën “Shpëtim Robaj” në Komoran. Nuk raportohet për persona të lënduar. Me të marrë informatën policia, ka dalë në vendin e ngjarjes,ku ka konstatuar se ka pasur të shtëna me armë dhe raportohet vetëm për dëmtim prone (dëmtim i veturës). Lidhur me rastin policia ka shoqëruar në stacion policor dy persona të përfshirë në rast. Aktualisht policia ka nisë punën për zbardhjen e rrethanave dhe motiveve që karakterizojnë ngjarjen. Bazuar në të dhënat e deritanishme incidenti nuk lidhet me procesin e zgjedhjeve”, tha Ahmeti.
