Kandidati i Partisë Demokratike të Kosovës (PDK) për kryetar të Komunës së Prishtinës, Uran Ismaili, ka votuar sot në Shkollën Fillore të Mesme të Ulët “Ismail Qemali” në kryeqytet.
Me këtë rast, ai u bëri thirrje qytetarëve që të dalin në zgjedhje, duke theksuar rëndësinë e pjesëmarrjes për të ardhmen e kryeqytetit.
“Sot është një ditë e mirë në të cilën të gjithë vendosim për të ardhmen e Prishtinës për katër vitet e ardhshme. Prishtina ta shfrytëzojë mundësinë për ndryshim, për t’u bërë qyteti që duam ta shohim të zhvilluar”, u shpreh Ismaili.
Ai shtoi se fushata e tij është ndërtuar mbi idenë e ndryshimit, dhe theksoi se pjesëmarrja e qytetarëve është kyçe për ta bërë këtë ndryshim realitet.
“Ftoj të gjithë qytetarët, pa dallim, të dalin e të votojnë. Të shfrytëzojnë këtë mundësi të madhe që e kemi”, pohoi ai.
Në këtë qendër votimi (nr. 1910), e cila përfshin rreth 10 mijë qytetarë me të drejtë vote, janë të hapura 11 vendvotime. Deri në orën 09:00, kanë votuar 391 qytetarë, apo 3.92% e trupit elektoral në këtë qendër.
