Tre punonjës të Amiri Diwan të Katarit, organit suprem qeveritar, vdiqën në një aksident të rëndë trafiku pranë vendpushimit egjiptian Sharm el-Sheikh në Detin e Kuq. Lajmi u konfirmua nga ambasada e Katarit në Egjipt përmes një postimi në rrjetin social X, shkruan Reuters. Ata ishin pjesë e ekipit negociator që do të marrë pjesë në samitin e armëpushimit nesër në Gaza.
Dy persona të tjerë u plagosën në aksident dhe po trajtohen në një spital lokal dhe po marrin të gjithë kujdesin e nevojshëm mjekësor. Ambasada njoftoi se të plagosurit, si dhe trupat e të ndjerëve, do të kthehen në Doha më vonë gjatë së dielës.
Sipas informacioneve të mëparshme të dhëna për Reuters nga dy burime sigurie, aksidenti ndodhi kur një makinë që transportonte zyrtarë të Katarit u përmbys në një kthesë rrugore, afërsisht 50 kilometra larg qytetit.
Aksidenti ndodhi vetëm disa ditë pasi zyrtarë nga Katari, Turqia dhe Egjipti morën pjesë në bisedime indirekte në Sharm el-Sheikh, të cilat rezultuan në një marrëveshje midis Izraelit dhe Hamasit mbi fazën e parë të një plani paqeje. Qyteti egjiptian do të presë një samit global të hënën për të finalizuar marrëveshjen.
