Gjatë fundjavës, në disa komuna të Kosovës janë regjistruar disa raste të armëmbajtjes pa leje, të cilat kanë rezultuar me arrestimin e personave të dyshuar dhe konfiskimin e armëve të ndryshme të zjarrit nga ana e Policisë së Kosovës.
Policia ka bërë të ditur se në Prishtinë, është arrestuar një person i dyshuar mashkull kosovar nën dyshimin se kishte shtënë me armë zjarri. Gjatë kontrollit, atij i është konfiskuar një pistoletë me gaz dhe 21 fishekë.
Në këtë komunë janë shënuar edhe tri raste të tjera të ngjashme.
Një person është arrestuar pasi iu gjet një pistoletë dhe tetë fishekë në posedim. Më pas, një tjetër i dyshuar është ndaluar me një armë të tipit “Zoraki” dhe katër fishekë.
Po ashtu, një tjetër person është arrestuar nën dyshimin për të shtëna me armë zjarri; nga ai është konfiskuar një pistoletë dhe një gëzhojë. Pas intervistimit, me vendim të prokurorit, është liruar në procedurë të rregullt.
Një rast tjetër është raportuar më herët, më 13 korrik 2025, në zonën industriale të Prishtinës, ku një person i panjohur kishte braktisur një armë zjarri me 15 fishekë. Pas ekzaminimit balistik, më 13 tetor 2025, me vendim të prokurorit është hapur rasti dhe hetimet janë në vijim.
Ndërkohë, në Prizren, është arrestuar një person pasi gjatë kontrollit në veturë i është gjetur një pistoletë me 14 fishekë. Gjatë bastisjes në shtëpinë e tij, policia ka konfiskuar edhe një revole me gjashtë fishekë dhe një pushkë gjahu me pesë fishekë. Me vendim të prokurorit, i dyshuari është dërguar në mbajtje.
Edhe në Mitrovicë, është arrestuar një person tjetër nën dyshimin se kishte publikuar në rrjetet sociale fotografi ku shfaqej me armë në dorë, përfshirë një pushkë automatike, një pistoletë dhe një granatë dore. Gjatë kontrollit në shtëpinë e tij nuk është gjetur asgjë e dyshuar, dhe pas intervistimit, me urdhër të prokurorit, është liruar në procedurë të rregullt.
Në të gjitha rastet, armët e konfiskuara janë dorëzuar për procedura të mëtejshme ligjore, ndërkohë që hetimet për secilin rast janë në vijim.
