Ramiz Lladrovci kryetar i deritashëm i Drenasit ka arritur që me iniciativën e re “Për Drenasin Kampion me Ramiz Lladrovcin”, pa balotazh ta mbajë komunën që ka drejtuar deri tash, me 52, 31 për qind të votave, duke e lënë prapa me 37,31për qind kundërkandidatin e tij nga PDK-ja, Petrit Hajdari.
Hajdari thotë se e respekton verdiktin e qytetarëve, derisa i ka uruar fitoren Lladrovcit.
“Drenasin e dua edhe kur nuk fitoj”, ka shkruar Hajdari.
“Ju faleminderit nga zemra të gjithëve për garën e jashtëzakonshme e demokratike që zhvilluam bashkërisht dje. Përgjatë kësaj fushate, kam bërë të gjitha përpjekjet njerëzore për t’i sjellë Drenasit një qeverisje të mirë në të cilën kam besuar fort. Ju falënderoj shumë të gjithë juve që më keni votuar e keni besuar tek unë, ekipi dhe vizioni ynë. Por, gara e demokracia është kjo dhe unë e respektoj verdiktin tuaj. Kundër kandidatin tim, Ramiz Lladrovcin, e uroj për fitoren dhe shpresoj që Drenasi të përjetojë zhvillim e suksese”, ka shkruar Hajdari një ditë pas garës në zgjedhjet lokale.
