Nga 38 komunat e Kosovës, 21 kanë përmbyllur garën për kryetarë që në rundin e parë të zgjedhjeve lokale të mbajtura më 12 tetor, ndërsa 17 komuna të tjera do të shkojnë në balotazh më 9 nëntor.
Sipas rezultateve preliminare të Komisionit Qendror të Zgjedhjeve (KQZ), disa fitore janë shënuar në komunat e mëdha, si:
Në Ferizaj, Agim Aliu nga PDK ka fituar me mbi 56% të votave, duke siguruar mandatin e dytë.
Në Lipjan, Imri Ahmeti nga LDK ka fituar pa balotazh me mbi 51%.
Në Podujevë, Shpejtim Bulliqi nga LVV ka siguruar mbi 53% të votave.
Sami Lushtaku nga PDK ka arritur një fitore bindëse në Skenderaj me mbi 83% të votave.
Në Kamenicë, Kadri Rahimaj i LVV-së ka fituar me mbi 50%.
Ilir Ferati i LDK-së ka fituar në Istog me 58% të votave.
Në Shtime, Qemajl Aliu i LVV-së ka siguruar mandatin e dytë me mbi 50%.
Ekrem Kastrati i Nismës Socialdemokrate ka fituar Malishevën me mbi 53%.
Në Deçan, Bashkim Ramosaj i AAK-së ka fituar me mbi 51%.
Në Drenas, Ramiz Lladrovci, nga iniciativa “Për Drenasin Kampion me Ramiz Lladrovcin”, ka fituar me mbi 52% të votave.
Mehmet Ballazi i PDK-së ka fituar në Hanin e Elezit me mbi 50%.
Në Mamushë, Abdulhadi Krasniç i KDTP-së ka siguruar fitore me mbi 50% të votave.
Ndërkaq, në katër komunat me shumicë serbe, Mitrovicë e Veriut, Zveçan, Leposaviq dhe Zubin Potok, fitues janë kandidatët e Listës Serbe, parti kjo që ka siguruar fitore edhe në Novobërdë, Shtërpcë, Graçanicë, Ranillug dhe Partesh.
Në 17 komunat e tjera gara do të vazhdojë në rundin e dytë, që do të mbahet më 9 nëntor 2025. Tash në raundin e dytë, LVV ka shkuar në ballotazh në 12 komuna, PDK ka shkuar në 6 komuna, LDK në 8 komuna, AAK në 5 komuna, dhe Lista Serbe në një komunë.
Komunat në balotazh
Dragash – LDK – PDK
Fushë Kosovë – VV – LDK
Gjakovë – AAK – VV
Gjilan – VV – LDK
Junik – LDK – AAK
Kaçanik – PDK – VV
Klinë – AAK – PDK
Kllokot – LS – SNS
Mitrovicë – PDK – VV
Obiliq – LDK – VV
Pejë – LDK – VV
Prishtinë – LDK – VV
Prizren – PDK – VV
Rahovec – AAK – VV
Suharekë – AAK – LDK
Viti – LDK – VV
Vushtrri – PDK – VV
Sipas KQZ-së, pjesëmarrja në votime në nivel vendi ka qenë rreth 39%.
Ndërkohëm sot do të nisë numërimi i votave për asamblistët. Kështu ka bërë të ditur për RTK-në, zëdhënësi i KQZ-së, Valmir Elezi, duke shtuar se votat e kandidatëve për anëtarët e kuvendeve komunale numërohen në qendrat komunale të numërimit.
Sipas Elezit, numërimi do të fillojë në orare të ndryshme, në disa qendra në orën 12:00 dhe në disa të tjera në orën 16:00.
Procesi zgjedhor në vend, i cili u zhvillua dje, u vlerësua i qetë dhe pa incidente. Prokuroria e Shtetit angazhoi rreth 100 prokurorë dhe zyrtarë të sistemit prokurorial për ta mbikëqyrur procesin dhe për të proceduar çdo parregullsi të mundshme. Policia e Kosovës, në bazë të planit operativ garantoi siguri dhe mbarëvajtje të procesit.
Udhëheqësit e shtetit dhe ambasadorët e akredituar i kanë uruar qytetarët e vendit për zgjedhje të qeta dhe demokratike.
