Në kuadër të fushatës për parandalimin e keqpërdorimit të armëve të zjarrit dhe të shtënave festive, Policia e Kosovës, me mbështetjen e UNDP-së përmes Programit të Sigurisë (KSSP), po avancojnë komunikimin dhe bashkëpunimin me forumet lokale të sigurisë.
“Nga data 14 deri më 16 tetor 2025 do të mbahet një punëtori ku do të rishikohen Procedurat Standarde të Veprimit, termat e referencës dhe mjetet raportuese për krimet dhe dukuritë negative, duke përfshirë edhe keqpërdorimin e mjeteve piroteknike dhe të shtënat festive”, thuhet në njoftimin e Policisë së Kosovës.
Tutje theksohet se qëllimi i kësaj punëtorie është fuqizimi i anëtarëve të Komiteteve Lokale për Siguri Publike dhe përforcimi i bashkëpunimit ndërmjet institucioneve të ligjit dhe qytetarëve, për të ndërtuar bashkësi më të sigurta, ku festimet të jenë pa rrezik.
