Policia e Kosovës ka sekuestruar dy armë dhe 82 fishekë gjatë një bastisjeje të kryer në fshatin Korishë të Prizrenit.
Sipas njoftimit të Policisë, më 13 tetor 2025, një qytetar kishte raportuar në Stacionin Policor Prizren-Veri se kishte parë një person të dyshuar duke nxjerrë një armë të gjatë nga automjeti i tij, duke u ndier i frikësuar për shkak të mosmarrëveshjeve të mëparshme pronësore me të.
Me urdhër të Prokurorit të Shtetit dhe pëlqimin e gjyqtarit të procedurës paraprake, policia ka kryer bastisje në banesën e të dyshuarit, në prani të avokatit mbrojtës. Gjatë kontrollit janë gjetur dhe sekuestruar: një pushkë gjahu njëtyëshe, një pushkë ajrore dhe 82 fishekë gjahu.
Edhe pse armët ishin me leje valide, prokurori ka urdhëruar sekuestrimin e përkohshëm të tyre për shkaqe sigurie, ndërsa rasti do të procedohet në mënyrë të rregullt. Hetimet lidhur me rastin janë në vazhdim.
