Balerinit ukrainas Sergei Polunin i është hequr shtetësia me dekret presidencial, konfirmuan autoritetet dje. Balerini fitues i çmimeve, me origjinë nga rajoni i Khersonit – një nga rajonet më të goditura nga agresioni rus – më parë mbante shtetësi ukrainase, ruse dhe serbe, raporton The Kyiv Independent .
Mbështetje e hapur për Putinin
Polunin njihet nga publiku si një fans i madh i Presidentit rus Vladimir Putin, portretet e të cilit i ka tre tatuazhe në gjoks. Në intervista të mëparshme, ai ka deklaruar se “gjithmonë e ka konsideruar veten rus” dhe ka mbështetur në mënyrë aktive pushtimin rus të Ukrainës, përfshirë pushtimin e qytetit të tij të lindjes, Kherson.
Dje, Presidenti Volodymyr Zelensky konfirmoi se janë marrë “vendime të përshtatshme” në lidhje me “praninë e konfirmuar të shtetësisë ruse tek individë të caktuar”, pa e përmendur drejtpërdrejt Poluninin. Përveç tij, shtetësia ukrainase iu hoq edhe kryetarit të bashkisë së Odesës, Gennady Trukhanov, për shkak të akuzave shumëvjeçare se ai ka pasaportë ruse, dhe Oleg Tsarev, një ish-politikan ukrainas i cili u bë bashkëpunëtor i Rusisë.
Një karrierë e shënuar nga skandale
Polunin fitoi famë botërore pasi u shfaq në videoklipin muzikor të Hozier për këngën “Take Me to Church”, dhe gjithashtu ka pasur role në filma hollivudianë si “Red Sparrow” dhe “Murder on the Orient Express”. Megjithatë, karriera e tij është shënuar edhe nga skandale të shumta, duke përfshirë akuza për abuzim me substanca dhe deklarata homofobike dhe seksiste.
Pas një periudhe pune me Baletin Mbretëror në Londër, Polunin shërbeu si drejtor i Teatrit të Operas dhe Baletit të Sevastopolit dhe drejtues në detyrë i Akademisë së Koreografisë së Sevastopolit në Krimenë e pushtuar nga dhjetori 2019 deri në verën e vitit 2024. Ai u shkarkua nga këto pozicione pasi shkroi në kanalin e tij Telegram, i cili është fshirë që atëherë, se ndiente “shumë keqardhje për njerëzit” që jetonin në një fshat pranë Khersonit.
Një thirrje për paqe dhe largim nga Rusia
Në të njëjtin postim, ai i bëri thirrje Putinit që t’i jepte fund luftës, duke shtuar se “marrëveshja më e keqe do të ishte më e mirë se lufta”. Në fund të vitit 2024, Polunin njoftoi se po largohej nga Rusia sepse “shpirti i tij nuk është në vendin e duhur”.
“Koha ime në Rusi ka mbaruar prej kohësh, duket se në këtë moment e kam përmbushur misionin tim këtu”, shkroi ai në Telegram në atë kohë. Vendndodhja e tij aktuale nuk dihet.
