Pas njoftimit të paradites nga Gjykata Themelore për nisjen e gjykimit në mungesë për tre serb, kjo gjykatë ka njoftuar se po të njëjtën ditë, më 22 dhjetor do të nisë gjykimi edhe për tre serb të tjerë për veprën penale të krimeve të luftës.
Gjykata Themelore në Prishtinë, Departamenti Special, ka bërë të ditur se për datën 22 dhjetor të këtij viti e ka caktuar seancën e shqyrtimit fillestar në këtë çështje penale e cila ka për objekt shqyrtimin e aktakuzës së ngritur nga Prokuroria Speciale më 14 maj të vitit të shkuar.
“Sipas propozimit të Prokurorisë Speciale të Republikës së Kosovës, gjykimi në këtë çështje do të zhvillohet në mungesë të të pandehurve, për shkak se te njëjtit kanë qenë te pa arritshëm deri në momentin e ngritjes se aktakuzës”, thotë Gjykata Themelore.
Kjo Gjykatë u ka bërë thirrje të pandehurve, Ljubomir Çimburoviq, Predrag Bradiq dhe Milivoje Iviq që të paraqiten dhe të dorëzohen para organeve të ndjekjes së Republikës së Kosovës.
“Gjithashtu, u bëhet thirrje të gjithë personave që posedojnë informacione relevante lidhur me vendndodhjen e të akuzuarve, që t’i komunikojnë këto informacione Policisë së Kosovës apo organeve tjera kompetente. Njoftohen te pandehurit dhe gjithë opinioni publik se seanca do te mbahet ne Gjykatën Themelore ne Prishtinë, Pallati i drejtësisë Hajvali, Objekti D , Kati I, salla nr.27, me datë 22.12.2025 nga ora 09:30, nga Kryetari i Trupit Gjykues Leon Përlaska”, bëhet e ditur në komunikatën e Themelores në Prishtinë.
