Kryetari i Aleancës për Ardhmërinë e Kosovës, Ramush Haradinaj, ka thënë se AAK ka arritur rezultat historik në këto zgjedhje.
Ai njoftoi se Aleanca ka fituar pa balotazh në Deçan, ndërsa me numërimin e votave me kusht dhe atyre nga diaspora, presin fitore në raundin e parë edhe në Gjakovë, Suharekë dhe Klinë.
“Sot, bashkë me kolegët nga Kryesia dhe Këshilli i Përgjithshëm i Aleancës, diskutuam mbi mbarëvajtjen e procesit zgjedhor dhe rezultatin e arritur. Aleanca ka fituar pa balotazh në Deçan, ndërsa me numërimin e votave me kusht dhe atyre nga diaspora, presim fitore në raundin e parë edhe në Gjakovë, Suharekë dhe Klinë. Në Rahovec, jemi fitues absolut që në raundin e parë, me diferencë të theksuar nga partia e dytë, ndërsa në Junik hyjmë në raundin e dytë të vendosur për fitore”, shkroi Haradinaj në Facebook.
Sipas tij, Aleanca renditet e para në pesë komuna edhe për numrin e asamblistëve në kuvendet komunale, me mbi 100 asamblistë të zgjedhur, pa llogaritur votat e diasporës dhe ato me kusht.
“Pikë tjetër e diskutimit në mbledhjen e sotme ishte edhe procesi i krijimit të institucioneve qendrore, ku Aleanca do të marrë qëndrime të qarta dhe të përgjegjshme në përputhje me interesin e vendit”, përfundoj kreu i AAK-së.
