Presidenti i Serbisë, Aleksandar Vuçiç, konfirmoi se shërbimet serbe të sigurisë zbuluan praninë e tre shtetasve rusë në kampin “Sunçana Reka”, i cili ndodhet midis Loznicës dhe Mali Zvornikut.
Ai shtoi se persona me kombësi serbe që ishin në dispozicion të autoriteteve hetuese u ndaluan gjithashtu dhe se hetimi po vazhdon.
“Ne gjithashtu ndaluam qytetarë serbë që ishin në dispozicionin tonë. Ata na dhanë informacion se kush ishte dhe hetimi vazhdon. Ata janë ende në paraburgim”, tha Vuçiç.
Në një konferencë të përbashkët për shtyp me Presidenten e Komisionit Evropian Ursula von der Leyen, Vuçiç deklaroi se etno-fshati “Suncana Reka” përdorej si vend për stërvitje luftarake të shtetasve të huaj dhe se ky stërvitje, sipas tij, kishte për qëllim të shkaktonte trazira në Moldavi.
“Siç thashë, në këtë rast në atë kamp ishin të pranishëm edhe tre shtetas rusë. Kjo është ajo që mund t’ju konfirmoj”, tha Vuçiç, duke shtuar se nuk mund të pretendojë se shërbimet ruse qëndrojnë pas atij kampi, por se hetimi është duke vazhduar.
Në fund të shtatorit, Ministria e Punëve të Brendshme e Serbisë njoftoi se dy persona u arrestuan pranë Loznicës për shkak të ekzistencës së bazave të dyshimit se ata kishin kryer veprën penale të organizimit të pjesëmarrjes në luftë ose konflikt të armatosur në një vend të huaj.
Sipas njoftimit të Ministrisë së Brendshme, të arrestuarit LP (1988) dhe SS (1978) akuzohen se kanë organizuar stërvitje luftarake-taktike për shtetas të Moldavisë dhe Rumanisë, të cilat, dyshohet, kishin për qëllim stërvitjen e tyre për të ofruar rezistencë fizike më efektive ndaj oficerëve të policisë moldave në rast të trazirave gjatë ditës së zgjedhjeve në atë vend, të planifikuara për 28 shtator të këtij viti.
Siç u tha, LP organizoi dhe financoi trajnimin që u zhvillua në një restorant pranë Loznicës, ndërsa SS akuzohet se e ka ndihmuar në këtë drejtim.
Sipas dyshimeve, trajnimi u zhvillua në periudhën nga 16 korriku deri më 12 shtator dhe morën pjesë midis 150 dhe 170 qytetarë të Moldavisë dhe Rumanisë.
